“Nag-promise ako sa kaniya na ako ‘yung magiging mata niya for the rest of her life.”
Walang pag-aalinlangang pinagamot at kinupkop ng second-year Psychology student na si Jhed Diokno, 29, mula sa Kawit, Cavite, ang pusang may kumplikasyon sa mata na nakasalubong daw niya sa kalsada.
Sa panayam ng Balita, ibinahagi ni Diokno na kagagaling niya sa eskwelahan sa Imus, Cavite, nang makita niya sa kalsada ang pusang pinangalanan niyang “Kazuha”, na noong panahong iyon daw ay nasa malubhang kalagayan.
“Kinabahan po [ako], kasi syempre kitang kita ko ‘yung mata niya na halos lumuwa na. Then sobrang dami niyang blood, ‘yung trousers ko na white nagka-blood na rin since na bangga nya nga ako,” kuwento ni Diokno.
“Natulala ako ng more than 3 minutes sa sobrang shookt then binuhat ko siya agad, binitawan ko ‘yung kinakain kong kwek kwek.”
Doon ay naghanap na raw siya ng pinakamalapit na veterinarian para ipagamot si Kazuha. Dahil sa nanghihina ang pusa nang mga panahong iyon at may tusok pa ng stick sa isa niyang mata, akala raw niya ay hindi na ito makaka-survive.
“Pinupuntahan ko siya araw-araw after school then kinakausap ko siya na lakasan niya lang loob nya,” ani Diokno.
Nagpapasalamat naman si Diokno dahil naging maayos umano ang lagay niya sa loob ng isang linggong pamamalagi sa vet.
“Sadly she wasn’t able to open her eyes again po, as in closed na siya. But so far, she’s healthy and playful,” ani Diokno.
“Nag-promise ako sa kaniya na ako ‘yung magiging mata niya for the rest of her life.”
Maraming netizens naman ang naantig sa post ni Diokno sa Facebook group na ‘CATS & KITTENS Philippines’ tungkol sa nasabing pagkupkop niya kay Kazuha.
Sa ngayon ay umabot na sa mahigit 2,300 reactions, 300 comments, at 44 shares ang naturang post ni Diokno.
–
Nais mo bang mai-feature ang iyong storya o ‘di kaya mayroon kang larawan at video na gusto mong i-share? I-message mo lang kami sa aming Facebook at Twitter!
