Posibleng maging bagyo ang low pressure area (LPA) na inaasahang papasok sa Philippine area of responsibility (PAR) sa susunod na mga oras, ayon sa Philippine Atmospheric, Geophysical and Astronomical Services Administration (PAGASA) nitong Biyernes, Setyembre 29.
Sa Public Weather Forecast ng PAGASA dakong 4:00 ng umaga, inihayag ni Weather Specialist Aldczar Aurelio na huling namataan ang LPA sa labas ng PAR 1,715 kilometro ang layo sa silangan ng Central Luzon.
“Inaasahan po natin itong papasok papasok sa ating Philippine area of responsibility sa susunod na 24 hanggang 48 hours,” ani Aurelio.
Umaabot naman umano ang trough ng LPA sa silangang bahagi ng Visayas at sa Mindanao.
Bukod dito, ayon pa kay Aurelio, nakaaapekto naman ang southwest monsoon o habagat sa kanlurang bahagi ng Southern Luzon at sa Visayas.
Pagdating sa magiging lagay ng panahon, ayon sa PAGASA, inaasahang makararanas ng maulap na kalangitan na may kalat-kalat na pag-ulan at thunderstorms ang Eastern Visayas at Central Visayas dahil sa trough ng LPA.
Maulap na kalangitan na may kalat-kalat na pag-ulan at thunderstorms din ang posibleng maranasan sa Palawan, Zamboanga Peninsula, at mga natitirang bahagi ng Visayas bunsod naman ng habagat.
Posible umano ang pagbaha o kaya nama’y pagguho ng lupa sa mga nasabing lugar tuwing magkakaroon ng katamtaman hanggang malalakas na pag-ulan.
Samantala, inaasahang makararanas ng bahagyang maulap hanggang sa maulap na may tiyansa ng isolated rainshowers o thunderstorms sa Metro Manila at mga natitirang bahagi ng bansa dahil sa trough ng LPA o localized thunderstorms.
Maaari rin umano magkaroon ng pagbaha o pagguho ng lupa rito tuwing magkakaroon ng malalakas na thunderstorms.
‘Pinas, maaaring magkaroon ng 2 o 3 bagyo sa Oktubre – PAGASA
