Pinaghinalaan ng Armed Forces of the Philippines (AFP) ang China na may kagagawan umano sa nadiskubre nilang malawakang pagkalimas ng mga corals na nakapalibot sa Rozul Reef sa West Philippine Sea (WPS).
Sa isang news forum sa Quezon City nitong Sabado, Setyembre 16, ibinahagi ni Vice Adm. Alberto Carlos, commander ng Palawan-based Western Command (WesCom) na nangangasiwa sa mga operasyong militar sa WPS, na napansin umano nila ang muling pagkukumpulan o swarming ng mga sasakyang pandagat ng China sa Rozul Reef o Iroquois Reef noong Agosto.
Ito ay isang buwan lamang umano matapos nilang itaboy ang humigit-kumulang 50 barko ng Chinese maritime militia (CMM) sa naturang lugar.
Dahil dito, nagpadala raw ang militar ng mga diver nito upang magsagawa ng underwater survey sa Rozul Reef.
“Nakita namin na wala na ‘yung mga corals. Nasira na ‘yung mga corals and may debris,” ani Carlos.
“We are coordinating with scientists, experts to do their assessment of the area. So we already have the pinpointed areas na dati silang nagsu-swarm,” dagdag pa niya.
Samantala, nilinaw naman ni Carlos na iniimbestigahan pa nila ang nangyari at suspetsa pa lamang daw na ang Chinese vessels nga ang humakot ng corals sa Rozul Reef.
Kaugnay nito, binigyang-diin ni Carlos na ang Pilipinas lamang ang may karapatang mag-angkin sa resources sa loob ng exclusive economic zone nito sa WPS. Ito ay dahil umano sa arbitral ruling noong 2016, kung saan tinanggihan ang claims ng China sa South China Sea batay sa nine-dash line nito.
“That’s why it’s alarming because as far as the Western Command is concerned, it is our duty to protect that sovereign rights para sa mga Pilipino, sila dapat ang mag-enjoy ng resources na nandoon sa exclusive economic zone,” saad ni Carlos.
Sa ngayon ay target umano ng WesCom na dagdagan ang kanilang presensya sa Rozul Reef upang protektahan ito.
Isa pa sa mga istratehiyang tinitingnan ni Carlos upang maprotektahan ang interes ng bansa sa WPS ay ang pagsasagawa umano ng mga coordinated patrol sa mga kaalyadong bansa.
“We’re doubling our effort on that. We’re going to address that issue by increasing our presence there. We should be constant, have strong presence there. Sama-sama na,” ani Carlos.
