Dahil opisyal nang sumapit ang tag-ulan, pinaigting ng pamahalaang panlalawigan ng Bulacan nitong Sabado, Hunyo 10, ang mga hakbang upang makontrol, kung hindi man tuluyang mapuksa, ang dengue sa lalawigan.
Sa inilabas na ulat kamakailan ng Provincial Epidemiology and Surveillance Unit (PESU), nakapagtala ang lalawigan ng kabuuang 1,290 hinihinalang kaso ng dengue mula Enero 1 hanggang Mayo 27, na mas mababa ng 41 porsiyento kumpara sa kaparehong panahon noong nakaraang taon.
Gayunpaman, anim na namatay na may kaugnayan sa dengue ang naitala.
Limang bayan at lungsod ang natukoy na may mga barangay na nagkaroon ng apat o higit pang kaso ng dengue sa loob ng nakaraang dalawang linggo.
Kabilang dito ang mga Barangay Kaypian, Muzon at Sto. Cristo sa San Jose Del Monte City; Barangay Lambakin at Nagbalon ng bayan ng Marilao; Barangay Lawa at Pandayan ng Meycauayan City; Barangay Poblacion ng bayan ng Pandi; at Barangay San Mateo ng bayan ng Norzagaray
Ang mga apektadong hanay ng edad ng mga sakit ay isa hanggang 85 taong-gulang, ngunit karamihan sa mga kaso ay kabilang sa mga nasa edad isa hanggang 10 taong gulang, na 46 porsiyento ng kabuuang mga kaso.
Kasabay nito, nilagdaan ni Gobernador Daniel R. Fernando ang Memorandum DRF-03242023-121 tungkol sa “Awareness of Dengue Prevention and Control,” na tinutugunan ang 24 na alkalde na pag-ibayuhin at palakasin ang pagpapatupad ng Barangay Dengue Task Force.
Pinaalalahanan din ni Fernando ang mga Bulakenyo na gawin ang kanilang bahagi para protektahan ang sarili laban sa banta ng dengue.
Ang pamahalaang panlalawigan ay patuloy din na nagbibigay ng mga dengue chemicals at dengue NS1 kits sa mga lokal na pamahalaan at mga ospital sa mga lungsod at munisipalidad, at sinusuportahan ang fogging at pag-spray upang mapatay ang mga lamok.
Pinayuhan ng Provincial Health Office-Public Health ang publiko na humingi ng maagang konsultasyon sa pinakamalapit na ospital o Rural Health Unit kung sila ay nakakaranas ng lagnat sa loob ng dalawa o higit pang araw.
Ang dengue ay isang sakit na nakukuha sa pamamagitan ng kagat ng babaeng Aedes Aegypti na lamok na kadalasang nabubuhay at dumarami sa tubig. Sa panahon ng tag-ulan, inaasahang mas maraming breeding site ang mga lamok.
Freddie Velez
