Pinangunahan ni Vice President at Department of Education (DepEd) Secretary Sara Duterte ang paglulunsad ng programa ng Office of the Vice President (OVP) na “PagbaBAGo Campaign: A Million Learners and Trees” na naglalayon umanong pagkalooban ang isang milyong kabataan ng mga kagamitan sa pag-aaral at dental kits.
Sa isang post ng opisyal na page ni Duterte, ibinahagi niyang inilunsad ang nasabing programa sa Cebu City at iba’t ibang OVP satellite offices sa mga lalawigan ng Davao, Zamboanga, Surigao, Tacloban, Bacolod, Dagupan, Rehiyon V, BARRM, at Isabela, maging sa extension office nito sa Lipa, Batangas.
Katuwang naman umano ng OVP sa inisyatibo na naglalayong mabigyan ang isang milyong kabataan sa buong bansa ng learning materials at dental kits na laman ng mga ipamamahaging PagbaBAGo bags ang DepEd at Department of Environment and Natural Resources (DENR).
“Kasama din sa ating adbokasiya ang pukawin ang kamalayan ng mga kabataan sa kahalagahan ng kalikasan sa ating buhay ngayon at sa ating kinabukasan sa pagtatanim ng iba’t ibang mga puno o tree planting activity,” ani Duterte.
“Hudyat ito ng simula ng ating kampanya para pangalagaan ang ating kalikasan at paghandaan ang epekto ng climate change sa ating mga komunidad,” dagdag niya.
Bilang kalihim ng Department of Education, nanawagan din si Duterte na unahin umano ng bawat isa ang pagpapahalaga ng edukasyon para sa mga kabataang Pilipino at “mailayo sila sa kriminalidad, ilegal na droga, at insurhensiya upang matupad nila ang kanilang mga pangarap sa buhay.”
Sinimulan ni Duterte ang PagbaBAGo Campaign sa Davao City noong alkalde pa siya ng lungsod.
