Nakapasok na sa Philippine area of responsibility (PAR) ang super typhoon Mawar at tinawag sa lokal nitong pangalan na “Betty” nitong Sabado ng madaling araw, Mayo 27, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA, nakapasok ang super typhoon Betty sa PAR bandang 2:00 ng madaling araw.
Namataan umano ang mata ng bagyo 1,320 kilometro ang layo sa silangan ng Gitnang Luzon na may maximum sustained winds na 195 kilometer per hour at pagbugsong 240 kilometer per hour.
Sa isang public weather forecast kaninang umaga, sinabi ni PAGASA Weather Specialist Benison Estareja na hindi pa direktang maapektuhan ang bansa ng bagyong Betty.
Ang mga pag-ulan naman na maaring maranasan sa kasalukuyan ay dulot umano ng hanging habagat.
Ayon kay Estareja, lubos na lalapit sa kalupaan ang super typhoon Betty pagsapit ng Lunes, Mayo 29, hanggang Miyerkules, Mayo 31, partikular na sa Batanes at Babuyan Islands bandang 250 hanggang 300 kilometrong layo sa mata ng bagyo.
Kapag lumapit umano ang 500 hanggang 600 kilometro na radius ng super typhooon Betty sa malaking bahagi ng Northern Luzon simula sa Linggo, Mayo 28, hanggang sa Miyerkules, posibleng makaranas at mahagip ng malalakas na hangin at malakas na ulan ang malaking bahagi ng Cagayan Valley, hilagang bahagi ng Aurora, hilaga at silangang bahagi ng Cordillera Region, Ilocos Norte, at Ilocos Sur.
Kasabay nito ay magdadala naman umano ng pag-ulan ang Southwest Monsoon o Habagat sa kanlurang bahagi ng Luzon, Visayas at Mindanao mula Lunes hanggang Miyerkules.
Ayon din sa PAGASA, sa Huwebes, Hunyo 1, pa lamang naman lalayo sa kalupaan ng bansa ang bagyo at bahagyang hihina pa hanggang sa pagsapit ng Biyernes, Hunyo 2, hanggang sa makalabas na ito sa PAR.
