Naitala sa Juban, Sorsogon ang heat index na 50°C nitong Sabado, Mayo 27, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA, naranasan ng Juban ang “dangerous” heat index na 50°C bandang 3:00 ng hapon kanina.
Ang heat index ay ang pagsukat umano kung gaano kainit ang nararamdaman kapag ang “humidity” ay isinasama sa aktwal na temperatura ng hangin.
Maaaring malagay sa “danger” level ang mga heat index na mula 42°C hanggang 51°C dahil posible rito ang “heat cramp” at “heat exhaustion”.
“Heat stroke is probable with continued activity,” saad pa ng PAGASA.
Bukod sa Juban, Sorsogon ay nagkaroon din umano ng ‘dangerous’ heat index nitong Sabado sa mga sumusunod:
- Borongan, Eastern Samar (44°C)
- Dagupan City, Pangasinan (43°C)
- Iba, Zambales (43°C)
- Legazpi City, Albay (42°C)
- NAIA Pasay City, Metro Manila (42°C)
- Sinait, Ilocos Sur (42°C).
Noong Mayo 24, naitala sa San Jose, Occidental Mindoro ang pinakamataas na heat index sa bansa ngayong taon matapos makaranas ang lugar ng “extremely dangerous” na 53°C.
Matatandaang, dahil sa init ng panahon, ipinahayag ni Senate Minority Leader Aquilino “Koko” Pimentel kamakailan na dapat maglabas ang Department of Labor and Employment (DOLE) ng direktiba na naglalayong bigyan ng ‘work break’ ang outdoor workers tuwing mataas ang heat index sa kanilang lugar.
MAKI-BALITA: ‘Work break’ tuwing mataas ang heat index, ipagkaloob sa outdoor workers – Pimentel
Dahil din sa init ng panahon ay binigyang-diin kamakailan ni House Minority Leader at 4Ps Party-list Rep. Marcelino “Nonoy” Libanan na kinakailangan nang ibalik ang school calendar sa dati, kung saan bakasyon ang buwan ng Abril at Mayo, para umano sa kaligtasan ng mga estudyante.
MAKI-BALITA: ‘School calendar, kailangan nang maibalik agad sa dati’ – house leader
