Ang Maynila ang nakapagtala ng rekord bilang unang lungsod sa National Capital Region (NCR) na nakaabot ng 100% sa measles-rubella vaccination sa ilalim ng ‘Chikiting Ligtas 2023’ nationwide supplemental immunization campaign.
Kaugnay nito, binati at pinasalamatan ni Manila Mayor Honey Lacuna ang lahat ng city personnel, lalo na ang mga taga-Manila Health Department sa pamumuno ni chief Dr. Arnold ‘Poks’ Pangan, na tumulong sa kolaboratibong hakbang na nagresulta sa pangunguna ng Maynila sa listahan ng mga local government units (LGUs) bilang pinakamaraming batang nabakunahan laban sa measles, rubella at polio sa pinakamaagang panahon.
Sa ‘MACHRA’s Balitaan’ forum na ginawa ng Manila City Hall Reporters’ Association noong Lunes ng umaga, sinabi ni Pangan na ang Manila LGU ay nakapagtala na ng 97% na nabakunahan sa kaso ng measles at rubella at 92% sa polio.
Nagpahayag din siya ng tiwala na maaabot nila ang 100% target sa loob ng linggong ito mula noong Lunes, at napatunayan naman tama siya.
Ang nasabing immunization drive ay palaging itinutulak ni Lacuna mismo kasama si Pangan kung saan maging ang lahat 44 health centers at anim na city-run hospitals ay imo-mobilized at utilized para ang lahat ng mga batang kwalipikado na makatanggap ng free immunization ay mabilis na maturukan.
Si Lacuna, na isa ring doktor ay binigyang diin na ang nasabing sakit ay mayroong life-altering effects sa mga batang dinapuan nito sampu sa kanilang pamilya.
Nabatid na hanggang Mayo 25, 2023, may kabuuang 102.24 percent o 151,077 bata ang nabakunahan na kontra rubella habang 96.93% o 167,833 ang nabigyan ng oral polio vaccine.
Inulat ni Pangan na ang pangunguna ng Maynila sa nationwide immunization drive ay base sa “CY 2023 Measles Rubella Supplemental Immunization Activity Accomplishment Report.’
Ipinapakita nito na ang kabuuang percentage ng mga nabakunahang bata sa Maynila ay umabot na ng 100.86% mula sa 147,771 target na eligible population (9-59 months old), ang kabuuang bata na nabakunahan ay umabot na ng 149,043.
Para sa tagumpay ng programa, binigyang kredito ni Pangan ang mga empleyado ng MHD, barangay officials sa pamumuno ng Liga ng mga Barangay President Lei Lacuna at Manila Barangay Bureau director Boroboy Santiago dahil sa kanilang suporta upang matiyak ang tagumpay ng hakbang ng pamahalaang lungsod na mabakunahan ang mas maraming bata sa maikling panahon.
Ang “Chikiting Ligtas 2023: Join the Big Catch Up, Magpabakuna para sa Healthy Pilipinas!,” ay inilunsad bilang obserbasyon ng World Immunization Week (WIW) noong April 2023 ng Department of Health (DOH), kasama ang mga developmental partners United Nations Children’s Fund (UNICEF) at World Health Organization (WHO).
