Tinutulan ni Pangulong Ferdinand Marcos, Jr. ang panawagan ni Pangasinan 3rd District Rep. Rachel Arenas na magpatupad ng total deployment ban ng mga overseas Filipino worker (OFW) kasunod na rin ng ipinaiiral na work visa suspension sa Kuwait.
Sa social media post ng Presidential Communications Office (PCO), idinahilan ng Pangulo na patuloy ang pakikipag-usap ng gobyerno sa mga Kuwaiti official hinggil sa kanilang desisyong hindi na na maglalabas ng work visa sa mga Pinoy na nais magtrabaho sa lugar.
Isinapubliko ng Pangulo ang kanyang hakbang sa panayam ng mga mamamahayag sa 125th founding anniversary ng Philippine Navy sa Maynila nitong Biyernes.
“It’s their country. Those are their rules. So, we will just leave that issue open and hopefully we will continue to negotiate with them. We will continue to consult with them at baka sakali, down the road ay magbago ang sitwasyon, maibalik ngayon ang ating mga workers, lalo na ‘yung mga nabitin,” tugon ni Marcos sa mungkahi ni Arenas.
Hindi aniya nakapasok sa Kuwait ang aabot sa 800 na OFW dahil sa kautusang hindi na muna sila maglalabas ng bagong visa.
“Hopefully down the road, we will continue to work to improve that situation,” anang Pangulo.
“I don’t want to burn any bridges na sasabihin, baka in the future, baka in a little while, a few months from now, a year from now, sasabihin magbago ang sitwasyon….baka pwede pa tayong magpadala ulit ng mga ating workers sa Kuwait. Kaya’t…sometimes, overreaction ‘yung ban. Basta, ban na lang tayo ng ban. Hindi naman tama. We have to react to the situation as it is. And I think the proper reaction is to take the decision of the Kuwaiti government to no longer issue new visas,” dagdag pa ni Marcos.
