Natawa na lamang ang mga netizen sa Facebook post ng kapulisan sa Alamada, North Cotabato kung saan natagpuan na nila ang isang 18-anyos na babaeng napaulat na nawawala.
Ang siste, ito raw ay nasa kaniyang kasintahan, ayon sa ulat.
“Nawawalang dalaga natagpuang Nagmamahal,” ayon mismo sa caption ng “Cppo Alamada Mps.”
Mayo 22 raw nang dumulog sa pulisya ang mga magulang ng dalaga upang i-report na nawawala ito. Wala pa raw isang araw ay agad na nakatanggap ng scoop ang mga pulis kung nasaan ito.
Sa presinto, sinabi raw ng dalaga na kusa siyang sumama sa kasintahan. Hindi naman umano sinampahan ng demanda ang lalaki dahil pabor naman daw ang mga magulang ng dalaga sa kanilang relasyon.
“Wag po kayo mag-alala may consent po kay Ma’am at Sir yong post at the same time hindi po tutol ang tatay sa relasyon. Kaya wag na po tayong bitter 🙂. Nagmamahalan po sila,” paliwanag ng isa sa mga pulis na nagngangalang “Bernard Abarquez.” Makikita ito sa comment section ng isa sa mga litratong naka-post sa FB page ng pulisya.
Kinaaliwan naman ng mga netizen ang caption sa naturang Facebook post na talaga namang agaw-pansin.
“Yung caption ang nagdala hahaha.”
“Ang galing ng caption hahaha.”
“Legal age naman na si ate ghorl…”
“Sana all minamahal…”
“Love… Love… Love… Good job PNP Alamada.”
—
Nais mo bang mai-feature ang iyong storya o ‘di kaya mayroon kang larawan at video na gusto mong i-share? I-message mo lang kami sa aming Facebook at Twitter!
