Ginamit na ng Gilas Pilipinas ang kanilang lakas upang patumbahin ang Indonesia, 84-76, sa knockout semis, at tuluyang makapasok sa finals ng men’s basketball competition sa 32nd Southeast Asian (SEA) Games sa Morodok Techo Stadium sa Phnom Penh, Cambodia nitong Lunes ng gabi.
Naka-34 points ang naturalized player na si Justin Brownlee na naging sandata ng National team upang makabangon sa 11 points bentahe ng Indonesia.
Nabuhayan ng loob ang koponan ni Brownlee matapos kumana ng walong puntos, tampok ang dalawang tres at pahabol na buslo.
Nagtangka pang humabol ng Indonesia sa pangunguna ng dating import ng Terrafirma sa PBA na si Lester Prosper. Gayunman, nabalewala lamang ito dahil na rin sa matinding depensa ng Gilas Pilipinas.
Matatandaang tinalo ng Indonesia ang Gilas, 85-81, sa finals sa 31st SEA Games sa Hanoi, Vietnam noong Mayo 22, 2022.
Haharapin na ng Philippine team ang Cambodia sa finals sa nasabi ring venue sa Martes, Mayo 16.
