Tinatayang 104 mga estudyante sa Gulod National High School – Mamatid Extension sa Cabuyao, Laguna ang naospital umano matapos mahilo at mahimatay dahil sa init ng panahon habang isinasagawa ang fire drill nitong Huwebes, Marso 23.
Sa isang Facebook live kahapon, ibinahagi ni Mayor Dennis Hain na nagsimula ang nasabing fire drill mga alas-12:00 ng tanghali, kung saan pinapasok umano sa silid-aralan ang humigit-kumulang 3,000 mga estudyante.
“Doon sila’y nagsiksikan sa kabila ng init ng panahon,” saad ni Hain habang binanggit ding nasa 36°C hanggang 43°C ang temperatura nang mga sandaling iyon.
Mga tatlong oras umanong naghintay ang mga estudyante sa silid-aralan habang wala man lamang tubig at pagkain. Matapos iyon, pinalabas na umano sila sa open field kung saan nasa 30 minuto rin ang nilagi nila sa kabila ng init ng panahon.
Ayon pa kay Hain, dahil sa sobrang init ay nagreklamo at nanghingi na ng tubig ang mga estudyante ngunit hindi umano sila napagbigyan.
“Hindi po napagbigyan sapagkat ang mga scout po ang nagma-manage, so siguro ay hindi rin abot ng kanilang kaisipan dahil mga bata rin sila,” saad ni Hain. “Meron nang inabot na doon ng pagkahilo at talagang nawalan ng malay. Ang ilan po ay nagsi-seizure.”
Agad naman umanong rumesponde ang Cabuyao City Disaster Risk Reduction and Management Office (CDRRMO) upang bigyan ng paunang lunas ang mga estudyanteng nahilo at nahimatay habang nagaganap ang fire drill.
“Sa kabuuan, 104 na mga estudyante mula sa GNHS – Mamatid Extension ang dinala sa Cabuyao City Hospital, at Ospital ng Cabuyao upang mabigyan ng karagdagang atensyong medikal,” anang CDRRMO sa kanilang Facebook post.
Ayon sa alkalde, ibinahagi ng doktor na halos lahat sa mga naging pasyenteng estudyante ang na-dehydrate at nakaranas ng hypoglycemia.
Napauwi rin naman umano ang karamihan sa mga estudyante makalipas ang ilang oras matapos maka-recover sa ospital. Samantala, tatlong estudyante raw ang minomonitor pa ng LGU.
Pinaalalahanan muli ng CDRRMO ang mga paaralang makipag-ugnayan sa mga awtoridad tuwing magdaraos ng mga drill upang maabisuhan umano sila ng mga tamang pamamaraan sa pagsasagawa nito.
Suspendido naman nitong Biyernes, Marso 24, ang klase sa nasabing paaralan dahil sa nangyaring insidente.
