Tila isang tore umano ng usok at abo ang ibinuga ng Bulkang Ili Lewotolok sa Indonesia matapos itong sumabog nitong Biyernes, Marso 24.
Sa ulat ng Agence France Presse, wala pa umanong naitalang nasugatan o napinsala ng nasabing pagsabog na naglabas na ng isang tore ng usok na may taas na 700 metro (0.4 miles) sa isang liblib na bahagi ng Indonesia.
Sa kabila nito, nagpatawa pa rin ang mga awtoridad sa lugar ng exclusion zone nang dalawang kilometro sa palibot ng bunganga sa probinsya ng East Nusa Tenggara.
Pinayuhan din ang mga kalapit na residente na magsuot ng mask upang maiwasan ang mga problema sa paghinga, ayon sa Volcanology and Geological Hazard Mitigation Center.
Inabisuhan din umano ang mga residenteng maging alerto sa maaaring panganib ng “lava flows” at “hot clouds”.
Hindi pa naman daw pinalilikas ang mga residente sa kalapit na lugar at nananatili sa third-highest level ang alert status ng Bulkang Ili Lewotolok.
Huling umanong nagkaroon ng malakas na pagputok ang nasabing bulkan noong taong 2020 na siyang nagpalikas sa libo-libong mga pamilyang naapektuhan nito.
Ang bansang Indonesia ay matatagpuan sa Pacific “Ring of Fire” at mayroong halos 130 aktibong mga bulkan.
Matatandaang nito lamang nakaraang linggo, muling pumutok ang Bulkang Merapi at naglabas na maiinit na lava at abo.
BASAHIN: Bulkang Merapi sa Indonesia, pumutok, naglabas ng lava
