Viral at nagdulot ng katatawanan ngayon sa social media ang Facebook post ng netizen na si “Phao Claravall Pineda” matapos niyang mapansin ang isang talent na nasa magkasunod na eksena lamang, subalit tila ibang tao ang kaniyang ginagampanan.
Mapapanood sa eksena na biglang galit na pumasok sa loob ng isang bilyaran ang karakter ni John Estrada habang may hawak ng armalite. Makikita ang naturang talent na may suot na kulay asul na damit.
Paglabas ng karakter ni John sa labas ng bilyaran, makikita naman ang naturang talent na nakaupo at nakikipag-inuman. Ito ang napagdiskitahan ng karakter ni John.
Kapansin-pansing iisang tao lamang ito dahil sa kulay at disenyo ng damit, kahit na nilagyan ng balbas ang ikalawang paglabas nito.
“Why naman ganun Batang Quiapo? Wow magic eh. How much kaya talent fee ni Kuya. 😂😂😂 #BatangQuiapo,” pabirong caption ng netizen.
Naaliw naman ang mga netizen at kani-kaniyang komento sa comment section ng post.
Habang isinusulat ang balitang ito ay umabot na sa 113k reactions, 56k shares, at 109 comments ang naturang viral FB post.
Wala pang tugon, reaksiyon, o pahayag si Coco o ang pamunuan ng serye tungkol dito.
