Patay ang dalawa sa tatlong suspek sa pamamaslang sa kapatid ni Valencia, Negros Oriental Mayor Edgar Teves, Jr. sa nasabing bayan ilang oras matapos silang palayain nitong Miyerkules ng gabi.
Sa report ng pulisya, nakilala ang dalawang napatay na sina Danish Tim Moerch, 45, taga-West Balabag, at Myla Ozoa Cagas, taga-Brgy. Cadawinon, Dumaguete City.
Pinatay sina Moerch at Cagas sa Brgy. Balugo, Valencia nitong Pebrero 8 ng gabi, ayon sa pulisya.
Nadamay sa insidente at binawian ng buhay ang asawa ni Moerch na si Karen Kate Cadiente.
Angkas ni Moerch si Cadiente sa motorsiklo nang barilin ng mga hindi nakikilalang lalaki.
Sina Moerch, Cagas at John Edward Remollo, taga-San Jose, ay suspek sa pagpatay kay Don Paulo Teves, kapatid ng alkalde, at anak ni dating Mayor Edgar Teves, Sr., nitong Lunes.
Natagpuan ang bangkay ni Teves na nakabalot ng kumot at plastic sa isang lugar sa Valencia. Nakitaan ng isang tama ng bala ng baril sa kanyang ulo.
Matapos ang pagpatay kay Teves inaresto ang tatlong suspek.
Gayunman, iniutos ni Assistant Provincial Prosecutor Florence Ed Obial-Kadusale, na palayain sina Moerch at Cagas nitong Miyerkules dahil sa irregularidad sa pag-aresto sa mga ito.
May teorya ang pulisya na dating alitan ang motibo sa pamamaslang batay na rin sa rekord o blotter na isinapubliko ng pulisya.
Tumanggi munang magbigay ng pahayag si Valencia police chief, Maj. Roger Quijano, kaugnay sa insidente hangga’t hindi pa natatapos ang imbestigasyon.
Philippine News Agency
