Kinagiliwan ng netizens ang post ni Desza Bobias, 23, mula sa Antipolo City tampok ang aso niyang nag-abot sa kaniya ng bente pesos na parang sinasabing ito ang “ambag” niya sa kaniyang fur parent.
Sa panayam ng Balita Online, ibinahagi ni Bobias na nasa cr daw siya nang mga panahong iyon nang biglang sumunod sa kaniya ang aso niyang si “Spicy Adobo” para iabot ang bente sa kaniya.
Natawa pa raw siya dahil dahan-dahan itong lumapit sa kaniya at parang proud pa ang mukha nang maiabot ang nasabing paper bill sa fur parent nito.
“Clueless ako kung saan niya nakuha ‘yung pera pero sure akong sa’kin lang din ‘yun kasi kami lang naman nandito sa bahay,” kuwento ni Bobias.
Bagama’t first time daw siyang abutan ni Spicy Adobo ng pera, hindi naman daw ito ang unang pagkakataon na makahawak ito ng paper bills. Mahilig daw nitong laruin noon pa ang paper bills sa tindahan ng ina ni Bobias.
Gayunpaman, hindi pa raw nakakasira ng pera ang nasabing cute na fur baby.
“Pinaglalaruan niya lang. Tsinelas, linoleum at toys niya ang favorite niyang sirain. Alam niya siguro ‘yung value ng pera kaya di niya sinisira,” natatawang saad pa ni Bobias.
Hindi naman daw inasahan ni Bobias na magva-viral ang post niya tungkol dito.
“Gusto ko lang talagang i-share ‘yung tuwa ko sa kaniya pero sobrang saya sa puso na maraming nakaka-appreciate at naku-cute-an sa baby ko,” ani Bobias.
Sa ngayon ay umabot na sa mahigit 33,000 reactions, 1,400 comments, at 14,000 shares ang nasabing post ni Bobias.
–
Nais mo bang mai-feature ang iyong storya o ‘di kaya mayroon kang larawan at video na gusto mong i-share? I-message mo lang kami sa aming Facebook at Twitter!
