Ilulunsad na ng pamunuan ng Light Rail Manila Corporation (LRMC) ngayong Pebrero ang kauna-unahang smart locker system sa mga istasyon ng Light Rail Transit Line 1 (LRT-1).
Ayon sa LRMC, ang mga naturang smart lockers ay ilalagay sa lahat ng 20 istasyon ng LRT-1 upang makapaghatid ng episyenteng contactless delivery service para sa mga commuters na nais gamitin ang mga istasyon ng LRT-1 bilang pick-up locations para sa kanilang mga items.
Nabatid na lumagda na ang LRMC at ang Airspeed Group of Companies nitong Lunes para sa pagbili ng PopBox na siyang gagamitin sa naturang proyekto, sa pangunguna nina LRMC President at CEO Juan F. Alfonso, LRMC Head of Business Development John Kelly Tan, Airspeed Group Chairperson Rosemarie P. Rafael, at Airspeed International President & CEO Mariz C. Regis.
Anang LRMC, sa tulong ng naturang smart locker system, na ginagamit na rin ngayon sa mga lungsod sa Indonesia at Malaysia, ay makapaghahatid sa mga consumers ng mas madali at mas kumbinyenteng paraan upang makuha ang kanilang mga produkto.
Sinabi ng LRMC na ang Airspeed ang siyang aakto bilang kanilang official logistics partner sa paghahatid sa kanilang mga kostumer, kabilang ang mga e-commerce platforms at small and medium-sized businesses, ng naturang bagong fulfillment alternative.
Sa panig naman ni Alfonso, sinabi nito na ang pagbili ng mga naturang PopBox ay bahagi ng kanilang layuning paghusayin pa ang serbisyong ipinagkakaloob nila sa kanilang mga parokyano.
“The LRMC team is passionate about innovation. Driven by our shared mission to enhance the commuter experience and make it truly world-class, we want to make commuters feel like they are in a station that they might go to in other countries,” ani Alfonso.
“We aim to give our passengers a glimpse into our future, and we’re glad to partner with the Airspeed Group in making part of this vision happen,” dagdag pa niya.
Samantala, nangako naman si Rafael na lilikha ng mas mahusay at mas mabilis na online shopping experience para sa mga Pinoy sa pamamagitan nang pagtugon sa iba’t ibang fulfillment issues ng mga ito.
“We are proud to be part of bringing this new technology which provides convenience and time-efficiency for our clients’ customers. Airspeed always aims to make it happen for our stakeholders – from creating a better online shopping experience (for fulfillment) to faster, more efficient and convenient documents and parcels sending and delivery. This will now help address the different fulfillment issues that we encounter,” aniya.
