Wagi bilang “Best Supporting Actor,” kaniyang kauna-unahang acting recognition, si Kapuso actor Triviño para sa natatangi niyang pagganap sa hit fantasy-period Kapuso drama na “Maria Clara at Ibarra.”
Kinilala si Juancho ng 2022 TAG Awards Chicago sa kaniyang husay sa pagbibigay buhay sa karakter na prayle na si Padre Salvi.
Ang anunsyo, mababasa sa isang tweet ng TAG Awards Chicago ngayong Linggo, Enero 1.
“CONGRATULATIONS and may you continue to inspire others. Keep blessing the world with your core gift,” anang award-giving body sa Sparkle artist.
Tinalo ng Kapuso actor sina Jake Ejercito ng “A Family Affair,” Dion Ignacio ng “Alternate,” Paulo Avelino ng “Flower of Evil,” at Zaijian Jaranilla ng “A Broken Marriage Vow.”
Ito ang kauna-unahang acting award ng aktor sa loob ng kaniyang sampung taong showbiz career.
