Sinira ng Quezon City Police District (QCPD) ang mga nakumpiskang paputok at pyrotechnics na nagkakahalaga ng P810,697 sa Camp Karingal, Sikatuna Village, Quezon City nitong Sabado, Disyembre 31.
Nasamsam ang mga paputok at pyrotechnics mula sa 58 operasyong isinagawa ng 16 na istasyon at unit ng pulisya sa Quezon City mula Disyembre 20 hanggang 30.
Sinabi ng QCPD na ang pagkumpiska at pagsira ng paputok ay ginawa ng mga miyembro ng Explosive and Ordnance Division (EOD), QCPD, at Bureau of Fire Protection (BFP) alinsunod sa kampanyang “Ligtas Salubong 2023”.
Nanawagan si QCPD director Brig. Gen. Nicolas D. Torre III sa publiko na makiisa sa kampanya ng Ligtas Salubong 2023 para sa mas ligtas at maayos na pagdiriwang ng kapaskuhan.
Kabilang sa mga nakumpiskang paputok at pyrotechnics ay ang Picollo, Poppop, Five Star, Pla-pla, Ginat Whistle Bomb, Atomic Bomb (Super Lolo), Atomic Triangle (Goodbye Bading), at large Judas Belt (Goodbye Philippines).
Ang mga may-ari ng paputok ay kinasuhan ng paglabag sa Republic Act 7183 (An Act Regulating the Sale, Manufacture, Distribution and Use of Firecrackers and other Pyrotechnic devices) at City Ordinance No. SP 2618, S-2017 na nagbabawal sa paggamit ng paputok at pyrotechnic mga kagamitan sa lahat ng pampublikong lugar sa Quezon City.
“Nagpapasalamat po kami sa ating mamamayan na sumunod sa ating ipinatutupad na batas at regulasyon ngunit mayroon pa rin pong mangilan-ngilan na matitigas ang ulo na halos sa mga public market nagbebenta ay hindi makakalusot sa batas, kung kaya’t hindi kami nag-atubiling kumpiskahin. ang mga nasabing ipinagbabawal na paputok,” ani Torre III.
Alinsunod sa pagdiriwang ng Bagong Taon, pinaalalahanan ni Torre III ang mga pulis na iwasan ang indiscriminate firing.
Ang mga pulis na lalabag sa utos ay kakasuhan ng criminal offense at agad na tatanggalin sa serbisyo, iginiit niya.
Diann Calucin
