Nakauna na sa semifinals ang guest team na Bay Area Dragons matapos patalsikin ang Rain or Shine, 126-96, sa PBA Commissioner’s Cup sa PhilSports Arena sa Pasig City nitong Biyernes ng hapon.
Kumubra ng 47 puntos si Hayden Blankley habang ang import nila sa Dragons na si Andrew Nicholson ay nakaipon ng 32 puntos.
Naging instrumento si Blankley sa 60-44 na bentahe ng Dragons sa first half at siya rin ang nagbigay ng 34 na abante, 85-51, laban sa Elasto Painters.
Habang isinusulat ang balitang ito, naglalaro pa ang Magnolia at Phoenix Super LPG.
Sakaling manaig ang Hotshots laban sa Phoenix ay pasok na rin ito sa semifinals.
Tangan din ng Magnolia ang twice-to-beat advantage katulad ng Dragons.
