Pumasok na rin sa PBA Commissioner’s Cup semifinals ang Magnolia makaraang patalsikin sa kontensyon ang Phoenix Super LPG, 102-95, sa PhilSports Arena sa Pasig City nitong Biyernes ng gabi.
Desididong manalo si Magnolia import Nick Rakocevic dahil pinilit pang maglaro sa kabila ng tinamong pilay sa bukung-bukong sa kaagahan ng salpukan.
Naka-double-double pa rin si Rakocevic matapos kumana ng 18 puntos at 13 rebounds.
Dahil sa injury ni Rakocevic, rumatsada nang husto si Calvin Abueva matapos kubrahin ang 19 puntos.
Tumulong din sa opensa sina Paul Lee, Mark Barroca at Jio Jalalon hanggang sa maiuwi nila ang panalo laban sa kinapos na Fuel Masters.
Halos triple-double naman ang ipinamalas ng import ng Phoenix na si Kaleb Wesson sa nakubrang 16 puntos, 12 rebounds at siyam na assists.
Ilang oras bago maipanalo ng Hotshots ang laban, nauna nang pumasok sa semis ang guest team na Bay Area Dragons nang ibaon nila ang Rain or Shine.
