Tila narating na ng aktres na si Jodi Sta. Maria ang “exciting part” nang tanghalin siya bilang “Best Actress in a Leading Role” para sa natatangi niyang pagganap bilang Dra. Jill Ilustre sa ABS-CBN teleserye na “The Broken Marriage Vow,” Huwebes ng gabi, Disyembre 8, 2022 sa Chijimes Hall, Singapore.
Naging mahigpit ang laban sa pagitan ng iba pang international nominees gaya nila Sakshi Tanwar ng India, Kim Hye-Soo ng Korea, Rebecca Lim ng Singapore, at Cheryl Yang ng Taiwan. Nanalo si Jodi na may maliit na 0.07 winning margin lamang.
“This was so unexpected. Thank you to the Asian Academy, ABS-CBN, Dreamscape, BBC for allowing us to do the Philippine adaptation of Doctor Foster. Our directors, Connie Macatuno and Andoy Ranay. My co-actors and the production team, I would always say that it takes a village to be able to produce a wonderful series and I’m just at a loss for words. But again, thank you because this is the highlight of my year. God, I give you back all the glory and praise, thank you,” lahad ng best actress winner na si Jodi sa kanyang acceptance speech.
Agad naman nag-trend sa social media ang tagumpay na ito ni Jodi kasabay ng mga pagbati para sa aktres.
Si Jodi ang kauna-unahang aktres mula sa Pilipinas na nagwagi nang nasabing parangal mula sa Asian Academy Creative Awards, na siyang kumikilala sa husay ng iba’t ibang pelikula at TV shows mula sa Asia Pacific region.
