Ipinakita ng Ginebra San Miguel ang kanilang lakas matapos pabagsakin ang NorthPort Batang Pier, 122-105, sa pagpapatuloy ng PBA Commissioner’s Cup sa PhilSports Arena nitong Linggo ng gabi.
Pinangunahan nina Justin Brownlee at Jamie Malonzo ang Ginebra na hindi pumayag na masundan na naman ang pagkapanalo sa kanila ng NLEX nitong Biyernes.
Kumubra si Brownlee ng 31 puntos, 13 rebounds at siyam na assists, habang si Malonzo ay nakagawa pa ng 26 puntos.
Dahil umangat na sa 8-3 ang rekord ng Ginebra, buhay pa ang pag-asa nito na makuha ang twice-to-beat incentives para sa quarterfinals.
Kadikit na ng Gin Kings sa ikatlong puwesto ang Converge sa likod ng Bay Area Dragons at Magnolia.
