Major ng AFP, patay nang mabaril umano ang sarili

Isang army major ang patay matapos umanong mabaril ang sarili sa loob mismo ng kanilang barracks sa Camp Capinpin sa Tanay, Rizal nitong Linggo.

Ang biktima ay kinilalang si Army Major Reynaldo Cañete ng Armed Forces of the Philippines (AFP).

Batay sa ulat ni PSSG Jayson Magbanua ng Tanay Municipal Police Station, nabatid na dakong alas-12:50 ng hapon nang madiskubre ang insidente sa loob ng Old Central Barracks Building, na matatagpuan sa Camp Capinpin, Brgy Sampaloc,Tanay Rizal ngunit naireport lamang dakong alas-3:30 ng hapon.

Sa salaysay ng testigong si Army Major Dave Anthony Papael, nabatid na nakita niya ang biktima na duguan at walang malay na nakahiga sa kanyang higaan sa loob ng silid.

Napuna rin umano niya sa tabi ng biktima ang service firearm nito, na isang Glock 17 pistol na may serial number na AFP029823. 

Ayon kay PLTCOL Rodolfo Santiago, hepe ng Tanay MPS, kaagad na isinugod ang biktima sa Army Station Hospital Camp Capinpin, upang malapatan ng lunas dahil sa tama ng bala sa ulo na kanyang tinamo.

Kalaunan ay isinakay ito ng helicopter upang ilipat ng pagamutan ngunit binawian din ito ng buhay.

Hinala naman ng mga otoridad na accidental firing ang naganap. Posible umanong naglilinis ng baril ang biktima at aksidenteng nabaril ang sarili.

Gayunman, patuloy pa rin ang imbestigasyon sa kaso.