Nagbubunyi ngayon ang pageant community matapos ang pasabog na anunsyo ng dalawang Miss Grand International 2020 finalists kaugnay ng kanilang nalalapit na kasal!
Parehong ikinagulat, at ikinasaya ng maraming fans ang “love wins” moment nina Miss Grand Argentina 2020 Mariana Varela at Miss Grand Puerto Rico 2020 Fabiola Valentin kamakailan.
Proud at walang takot kasing ibinahagi ng dalawa ang kanilang pag-iibigan kamakailan. Sa isang IG post, matapos anilang itago nang matagal, ibinulgar na sa wakas ng dalawa ang kanilang matamis na relationship status.
“After deciding to keep our relationship private, we open doors to them on a special day. 28/10/22,” mababasa sa IG post pareho nina Fabiola at Mariana noong Linggo, Okt. 30 kalakip ang kanilang intimate moments kasama na ang ilang tagpo sa kanilang wedding proposal sa isang IG reel.
Maraming netizens at pageant fans ang kinilig sa pasabog na anunsyo ng beauty queens.
Maging si Miss Grand Philippines 2020 at Miss Grand International 2020 first runner-up ay agad ding nagpaabot ng pagbati sa dalawa.
“Omg! Congratulations sisters! Lovelovelove! ❤️😍” mababasa sa komento ni Samantha Bernardo sa anunsyo ng dalawa.
Kilalang besties sina Mariana at Fabiola na parehong tumuntong sa Top 10 ng Thailand-based pageant competition noong 2021.
