Karumal-dumal ang sinapit ng 29-anyos na dalaga sa Brgy. Baritan, Malabon City matapos gahasain at patayin sa sariling pamamahay. Ang suspek, nakatakas at kasalukuyan nang pinaghahanap ng awtoridad.
Sa opisyal na pahayag ni Jeannie Sandoval, alkalde ng naturang lungsod, buong pwersa na ang kapulisan ng Malabon sa pagsasagawa ng imbestigasyon sa krimen.
Pinaghahanap na ang suspek na kinilala bilang si Jemak Reyes, residente ng Pantihan, Flores, Malabon.
Personal rin na sumama sa manhunt operation si Sandoval at Bise Alkade na si Ninong Dela Cruz.
“Personal ko pong nadama ang balitang ito, hindi lang dahil ako ay taga-Malabon, ngunit dahil tulad ng biktima, isa rin akong babae,” ani Sandoval.
“Ang masahol na krimeng ito ay hindi natin basta na lamang papalampasin. Kasama po ako ng pamilya ng biktimang maguusig ng lakas para sa karampatang hustisya,” dagdag pa niya.
Considerate, generous, mapagmahal, at responsable, iyan ang paglalarawan ni Kevin Sarmiento, matalik na kaibigan ng biktima.
Kasama ni Sarmiento at mga mahal sa buhay ng dalaga, humiling naman ang alkalde ng taimtim na panalangin para sa biktima upang mas mabilis na makamit nito ang hustiya.
