Iniulat ng Department of Education (DepEd) nitong Sabado na umaabot na sa mahigit 16 milyon ang bilang ng mga mag-aaral na nakapagpa-enroll para sa School Year 2022-2023.
Batay sa huling datos mula sa Learner Information System (LIS) ng DepEd, nabatid na hanggang alas-7:00 ng umaga ng Agosto 5, 2022, ay umaabot na sa kabuuang 16,029,252 ang bilang ng mga nagparehistro na mga mag-aaral para sa darating na taong panuruan.
Sa naturang bilang, 1,060,138 ang kindergarten; 7,376,586 ang elementary; 5,179,673 ang junior high school at 2,412,855 ang senior high school.
Pinakamarami na ang nakapagpatala sa Region IV-A (Calabarzon) na umabot sa 2,367,246 na sinusundan ng National Capital Region (NCR) na nasa 1,870470, at Region III (Central Luzon) na nasa 1,591,722.
Pinakamababa pa rin ang enrollment sa Cordillera Administrative Region (CAR) na nasa 182,370 pa lamang.
Anang DepEd, ang enrollment period, na sinimulan noong Hulyo 25, ay magtatapos sa Agosto 22, 2022, na siyang unang araw ng pasukan.
“Tandaan na mayroon tayong tatlong pamamaraan sa pagpapatala: in-person, remote, at dropbox enrollment,” anang DepEd. “Dagdag pa rito, ang ating mga Alternative Learning System (ALS) learners ay maaari na ring magpatala nang in-person o digital.”
Paalala pa ng DepEd, sa pagpunta sa mga paaralan, ating panatilihin ang proteksyon ng bawat isa. Huwag kalimutang sundin ang ating mga health and safety protocols. Sama-sama sa ligtas na balik-aral! Magparehistro na sa inyong paaralan!”
