Muntik pang matalo ang San Miguel Beer sa kanilang overtime kontra Terrafirma, 109-108, sa PBA Philippine Cup sa Araneta Coliseum nitong Huwebes.
Pinangunahan ni June Mar Fajardo ang koponan matapos maitala ang halos triple-double na 26 puntos, 10 rebounds at 9 assists.
Hawak na ngayon ng Beermen ang kartadang 9-1 panalo-talo.
Sa kabuuan ng laban, umabante ang San Miguel ng 13 puntos, gayunman, kumana nang husto ang limang manlalaro ng Terrafirma sa pangunguna ni Eric Camson sa huling yugto ng laban.
Dalawang beses ding nag-tie ang laro at ang huli ay 98-all na resulta ng tres ni JP Calvo kaya nauwi ito sa overtime.
Gumana ang opensa ng San Miguel sa OT sa tulong na rin ni Fajardo.
Nabigyan ng pagkakataon si Javi Gomez de Liano na maipanalo sana ang laro sa papaupos na oras. Gayunman, sumablay ang tira nito.
“Credit sa Terrafirma. Maganda ang game plan nila. Pero ‘di lang naman ako ang kailangan nilang i-stop eh. Maganda rin ang rotation namin,” komento naman ni Fajardo sa isang panayam pagkatapos ng laban.
