Nasa selda na ngayon ng Philippine Drug Enforcement Agency (PDEA) ang isang Chinese matapos mahulihan ng mahigit sa ₱272 milyong shabu sa inilatag na anti-drug operation sa Quezon City nitong Linggo, Hulyo 3.
Nahaharap na sa kasong paglabag sa Comprehensive Dangerous Drugs Act of 2002 (Republic Act 9165) ang suspek na si Jia Zhu, 33.
Kinumpirma naman ni PDEA director gen. Wilkins Villanueva na inaresto si Zhu sa ikinasang buy-bust operation sa Maria Clara St., Brgy. Lourdes, malapit sa Philippine Orthopedic Hospital dakong 10:30 ng umaga.
Tumulong sa pag-aresto ang mga tauhan ng Philippine National Police-Drug Enforcement Unit (DEU).
Nasamsam sa suspek ang mahigit sa 40 kilos ng illegal drugs, isang kotse, isang driver’s license, isang cellular phone, at marked money.
Masusi pa ring iniimbestigahan ang kaso upang matukoy ang mga kasabwat ni Zhu sa sindikato.
Chito Chavez
