Nawala ang bangis ng NLEX Road Warriors matapos padapain ng Magnolia Chicken Timplados, 87-73, sa PBA Philippine Cup nitong Sabado ng gabi.
Ginamit na sandata ng Magnolia sina Mark Barroca at Jio Jalalon na mayroong pinag-isang 34 puntos matapos nilang mahabol ang 15 puntos na abante ng Road Warriors, 43-28, sa ikalawang bugso ng laban.
Nakaipon din si Aris Dionisio ng 14 puntos at 12 puntos naman kay Ian Sangalang upang matulungan ang Magnolia sa ikatlong sunod na panalo.
Sa panig ng NLEX, nagsalansan si JR Quiñahan ng 17 puntos, at tig-14 naman si Don Trollano at Calvin Oftana.
Parehong hawak na ng Magnolia at Road Warriors ang kartadang 4-3 na panalo-talo.
