Wala nga yatang balak pag-aksayahan ng panahon ni Kapuso actress Bea Alonzo ang mga patutsada sa kaniya ng batikang showbiz columnist at talent manager na si Manay Lolit Solis.
Matatandaang muling nagpakawala ng mabibigat na pahayag si Manay Lolit laban sa aktres sa kaniyang Instagram noong Martes.
Mula sa pagkukumpara sa tila nawawala na umanong ningning Bea sa showbiz ay maging ang buhay pag-ibig at pasya ng aktres sa kaniyang buhay ay pinanghimasukan na rin ng talent manager.
“Dapat sa edad niya meron na siyang asawa at mga anak, pero single parin kaya nagtatanong ka, ano dahilan?” talak ni Manay sa 34-anyos na aktres.
Matapos ang sunod-sunod na pagpapakawala ng maaanghang na pahayag laban sa aktres ay nananatili naman itong dedma sa isyu.
Sa kaniyang Instagram, makikita ang abalang buhay ni Bea mula sa kabi-kabilang endorsements, paggawa ng content sa kaniyang YouTube account at ang pasilip sa estado ng kaniyang puso katuwang ang boyfriend na si Dominic Roque sa isang intimate date.
Nitong Miyerkules, nagbigay na rin ng komento ang talent manager kasunod ng pag-amin kamakailan ng aktres ukol sa isang dating boyfriend na ayaw na niyang makatrabaho muli.
Talak ni Manay Lolit, “Strong words. Tandaan ni Bea Alonzo na ang nang iwan sa kanya si Gerald Anderson, hindi siya. So huwag palabasin na parang ang may choice si Bea, si Gerald ang nasa upper hand dito dahil siya ang nang iwan, hindi siya iniwan, dahil ang na ghosting si Bea.”
Nanatiling kebs naman sa mga komentong ito ang Kapuso actress.
