Kinapanayam ni Toni Gonzaga ang tinaguriang “Godfather of Pinoy Rap” na si Andrew E sa kaniyang award-winning talk show vlog na “Toni Talks” na umere noong Fathers’ Day, Hunyo 19.
Isa sa mga napag-usapan nila ang naging buhay ni Andrew E noong nagsisimula pa lamang ito sa showbiz. Ibinahagi ni Andrew E ang di malilimutang eksena noong nag-audition siya sa teen-oriented show na “That’s Entertainment” ng pumanaw na TV host-star hunter na si German Moreno o Kuya Germs.
“Yung talent ko kasi is so unique na nagra-rap… So, sabi ni Kuya Germs, ‘Pakibigyan ng mic ‘yan. Hijo, anong gagawin mo? Teka, kumakanta ka ba?’ ‘Hindi po.’ ‘Sumasayaw ka?’ ‘Hindi rin po.’ ‘Eh, uma-acting ka?’ ‘Hindi rin po ako marunong no’n.’ ‘Eh, anong gagawin mo?’ ‘Puwede po ba ipakita ko na lang po sa inyo?” salaysay ni Andrew E kay Toni.
Nagpakitang-gilas umano siya sa pagra-rap subalit tila hindi raw talaga siya nagustuhan ni Kuya Germs. Sabi raw nito sa kaniya, “Okay. Thank you. Next!”
Pahabol daw niya, “‘Kuya Germs, hindi pa po tapos!’ ‘Hindi, hindi. Okay na!'”
Pagkatapos niya, tinawag na raw ang kasunod niya sa pila, ang magandang TV host-VJ-actress na si Donita Rose.
“Umupo ako. Pag-upo ko, lo and behold – Donita Rose. Tumayo. ‘Hello po.’ Tapos sabi (ni Kuya Germs), ‘Hija, do you know how to sing?’ ‘No.’ ‘Do you know how to dance?’ ‘No.’ ‘Do you know how to do acting?’ ‘No.’ ‘Do you have talent?’ ‘None.’ ‘Okay, tanggap ka na!’ Shocked ako. Sabi ko, ‘Walang talent pero nakapasa?'”
Kinuwento raw ni Andrew E kay Donita ang naturang pangyayari at tawa raw ito nang tawa.
“Sabi niya, ‘Ikaw pala yung maitim na katabi ko? Oh my goodness!'”
Hirit naman ni Toni, ang nakakatawa raw dito, si Andrew E pa raw ang kumanta ng theme song “Ober Da Bakod” na naging sitcom ni Donita sa GMA Network noon.
Pinuri naman ng rapper si Toni sa pagiging sharp nito. “Kaya ka number 1 host eh!”
Sa ngayon ay nasa number 2 trending na ang vlog na ito ni Toni sa YouTube channel na may 2,201,899 views na.
