Posibleng isailalim muli sa Alert Level 2 ang Metro Manila dahil umaakyat na naman ang bilang ng kaso ng nahahawaan ng coronavirus disease 2019 (Covid-19), ayon sa pahayag ng Department of Health (DOH) nitong Lunes, Hunyo 13.
Binanggit ng DOH ang naitalang 308 na nahawaan ng sakit sa Pilipinas nitong Linggo, Hunyo 12.
Sa naturang bilang, 153 ang naitala sa Metro Manila at ito na ang pinakamataas na kaso mula Abril 20 ng taon.
Sa panayam sa telebisyon, nilinaw ni DOH Undersecretary na mapipilitan silang higpitan ang quarantine restrictions kung magkakaroon ng paglobo ng kaso na magreresulta sa pagtaas ng hospital admissions sa Metro Manila.
“The possibility would always be there, ‘pag nagtuloy-tuloy po ang mga kaso pero ang kailangan pong maintindihan ng ating mga kababayan, we are learning to live with the virus. Alam po natin hindi ho aalis ang virus na ito, it will stay with us so eto pong mga sakit na nagkakaroon ng mild at asymptomatic, it should be acceptable po to the population,” paliwanag ni Vergeire.
“Ang pinakaimportante, hindi pa natin nakikitang tumataas ang severe and critical na mga kaso, at hindi pa rin po nagkakaroon ng problema sa ating mga ospital. Kung magtutuloy-tuloy po ang mga kaso siyempre makakakita tayo rin ng patuloy na pagtaas at baka ‘yung admissions natin sa ospital ay tumaas, and therefore ‘pag ganyan ang nangyari, magshi-shift tayo and mag-e-escalate sa Alert Level 2 natin,” anang opisyal.
Sa kasalukuyan, isinasailalim pa rin sa Alert Level 1 ang NCR matapos maitala ang araw-araw pagbaba ng kaso ng sakit mula pa noong Marso.
Sa datos naman ng Quezon City Health Office, nakapagtala sila ng 28 daily average cases nitong nakaraang linggo kaya isinailalim na rin sa yellow status ang lungsod.
