Sa barong-barong lang nanunuluyan ang pamilya ng Tawag ng Tanghalan contestant na si Edimar Bonghanoy matapos hagupitin ng Bagyong Odette ang lalawigan ng Cebu noong Disyembre 2021.
Ito ang dahilan ng napansing lungkot sa mukha ni Edimar matapos sumalang sa TNT at makapanayam ng hosts na sina Vice at Vhong.
Isang kwelang pakulo naman ang naisip ni Vice upang makalikom ng sapat na halaga para maipatayo ang panibagong tahanan ng pamilya ni Edimar. Isa-isa hiningan ng Unkabogable Star ang bawat host, hurado at performer ng Showtime family.
Unang nag-pledge si Vhong ng halagang P10,000 na sinundan ni Teddy sa halagang P5,000. Nakiisa rin ang mga huradong si Nyoy Volante na nagbigay ng P5,000, hurado Zsazsa Padilla na nag-ambag ng P10,000 at Ogie Alcasid na tinapatan ang inisyal na kabuuang halaga na P30,000.
Sunod na nag-ambag si Ion Perez at Jugz sa parehong halagang P5,000. Parehong P10,000 din ang ambag nina Ryan Bang at Karylle.
Ang kababayan ni Edimar na si Kim Chiu ay nagbigay din ng halagang P30,000 na dinagdagan pa ni Janine Berdin ng halagang P5,000 at P10,000 mula kay Tiyang Amy.
Sa huli, isinara ni Vice Ganda ang halaga at siya’y nag-pledge din ng halagang P65,000 para sa Cebuano contender.
Naluluha at abot-abot naman ang pasasalamat ni Edimar sa buong Showtime family sa hindi inaasahang blessing.
“Gusto naming mapasaya ka. Hindi man makita ngayon sa mukha yang kasiyahan na ‘yan pero alam naming na nararamdaman mo ‘yan at nararamdaman ng pamilya mo, at ‘yun ang nagpapasaya sa amin. Mahal ka namin!” ani Vice kay Edimar.
