Diretsahang inamin ni Herbert ‘Bistek’ Bautista ang hindi natupad na mabigat niyang pangako kay Kris Aquino na naging usap-usapan din kamakailan matapos tahasang banggitin ng aktres sa isang campaign sortie sa Tarlac.
Nagbalik-tanaw si Bistek sa kanilang naging relasyon ni Kris sa kanyang panayam kay Ogie Diaz sa YouTube channel nito.
“She’s a very intelligent person, very caring person, talagang maalaga. Always the words of wisdom, lagi kang makakarinig sa kanya,” paglalarawan ni Bistek kay Kris sa kanilang naging maikling pagsasama.
Matatandaang taong 2014 nang aminin noon ni Kris sa national television ang estado ng kanilang relasyon ni Bistek. Ngunit ilang buwan lang nang maging usap-usapan ang pagpapaikli ng buhok ni Kris dahil umano sa paghihiwalay ng dalawa.
Mula noon ay naging matalik na magkaibigan si Kris at Herbert. Subalit naging madalang na rin ang naging pag-uusap nila na umaabot sa pagitan ng tatlo hanggang limang buwan, pagkukuwento ni Bistek.
Naungkat naman muli ang kanilang relasyon kamakailan matapos tahasang sabihin ni Kris sa isang campaign sortie sa Tarlac na ‘wag iboto ang isang ex na hindi umano marunong tumupad sa pangako.
“Nung nagsalita siya tungkol dun sa Tarlac, hindi ko naman inassume na ako yun kasi wala naman siyang binanggit na pangalan,” anang senatorial aspirant nang hingan ng reaksyon ukol sa pahayag ng kanyang ex.
Nang magkaroon ng pagkakataon na makapagsalita sa parehong lalawigan, saad ni Bistek kay Kris: “Malaki ang respeto ko sa pamilya mo at saka sa’yo. Yung pagmamahal ko sa iyo bilang kaibigan ay hindi nawawala. Pagaling ka at kumain ka nang marami. Which I would always tell her.”
Pagbubulgar niya, nangako siya ng “marriage” kay Kris. “Pinag-usapan namin yung marriage,” aniya. “Pero siyempre, ‘yung marriage is a process,” dagdag niya.
“I think she went through the same pero whirlwind, eh. Parang laging whirlwind ‘yung dinadaanan niyang relationship na nagpapakasal siya,” teyorya ni Bistek kung bakit naging mabigat ito para kay Kris.
“Let’s go to the motion, to the process. We talked about it but because of her experience and because of what happened to me. Parang that conversation about marriage was serious but not as serious as really getting married,” pagbibigay detalye pa ni Bistek.
Samantala, kinumpirma ni Bistek na hindi na sila nagkakausap ni Kris ngayon.
“Hindi na kasi nadiyahe na rin naman ako. But I still consider her a friend and I know she still considers me her friend,” aniya.
Sa pinagdadaanan na sakit ngayon ng aktres, isang paumanhin naman ang binitawin ni Bistek sa dating kasintahan.
“I really feel bad about myself also. Wala ako dun sa tabi niya sa oras ng kanyang pangangailangan,” saad ni Bistek matapos humingi ng paumanhin sa aktres.
“I hope and pray she recovers soon enough.”
Sa huli, ayon kay Herbert, ang mga anak umano ni Kris ang pinaka-inaalala nito lalo nang simula siyang magkasakit.
“She’s always thinking about her children. She’s a very caring, very, very caring person. Hindi mo siya pwedeng tawaran,” ani Bistek.
