Iniulat ng Department of Health (DOH) na nakapagtala sila ng kabuuang 6,297 bagong kaso ng COVID-19 sa bansa mula Marso 1 hanggang 7.
Ang datos ay inilabas ng DOH nitong Lunes ng hapon, kung kailan sinimulan na rin ang paglalabas na lamang ng ahensiya ng weekly COVID-19 updates o tuwing Lunes na lamang na paglalabas ng update, kumpara sa dating arawang case bulletin.
Batay sa weekly update ng DOH, nabatid na ang average na bilang ng bagong kaso kada araw ngayong linggo ay nasa 899.
Mas mababa naman ito ng 30% kung ikukumpara sa mga naitalang kaso noong nakaraang linggo o mula Pebrero 22 hanggang 28.
Sa mga bagong kaso na ito, tatlo ang severe at critical.
Sa kabuuan, may 1,055 kaso ng severe at critical COVID- 19 cases ang naka-admit sa ospital.
May 615 namang naitalang bagong nasawi nitong nakaraang linggo.
Pero sa bilang na ito, 39 lang ang nangyari ngayong Marso, ang iba ay noong nakaraang buwan at nakalipas na taon pa.
Samantala, iniulat rin ng DOH na sa 3,138 ICU beds para sa mga pasyenteng may COVID-19, 807 (25.7%) ang okupado.
Nasa 18.4% naman ng 24,678 non-ICU COVID-19 beds ang kasalukuyan ding ginagamit.
“Higit sa 63 milyong indibidwal o 70.76% ng ating target na populasyon ang bakunado na laban sa COVID-19 habang 10.5 milyong indibidwal naman ang nakatanggap na ng kanilang booster shots. Sa kabilang banda, 6.4 milyong senior citizens o 74.22% ng ating target A2 population ang nakatanggap na ng kanilang primary series,” ulat pa ng DOH.
“Mula Marso 1 hanggang Marso 7, 2022, 6,297 na bagong kaso ang naitala sa bansa. Ang average na bilang ng bagong kaso kada araw ngayong linggo ay nasa 899, mas mababa ng 30% kung ikukumpara sa mga kaso noong February 22 to 28. Sa mga bagong kaso, 3 o 0.05% ng mga bagong kaso ang kasalukuyang may malubha at kritikal na karamdaman. Samantala, mayroon namang naitalang 615 na pumanaw,” anito pa.
Patuloy namang pinapaalalahanan ng DOH ang lahat na huwag maging kampante sa banta ng COVID-19.
“Bagkus, dapat natin ipagpatuloy ang tamang pagsunod sa minimum public health standards sa ilalim ng Alert Level 1,” anito pa.
Paalala ng DOH, laging magsuot ng best-fitted facemask at kung maaari, manatili sa well-ventilated na mga lugar.
Sa oras na makaramdam ng sintomas, dapat rin umanong kaagad na mag-isolate.
Upang magkaroon naman ng dagdag na proteksyon laban sa banta ng COVID-19, pinayuhan rin ng DOH ang publiko na kaagad na magpabakuna at magpaturok ng booster shots.
