Nangako si Senatorial aspirant Mark Villar na ipagpapatuloy niya ang programang “Build, Build, Build” (BBB) na sinimulan ng administrasyong Duterte habang binanggit niya ang malaking tagumpay na nakamit nito sa paglikha ng hindi bababa sa 6.5 milyong trabaho para sa mga Pilipino.
Sa isang guest appearance sa online show na “Sara All For You”, binanggit din ni Villar na ang BBB program ay nakapagtayo ng mahigit 30,000 kilometro ng mga kalsada mula nang ilunsad ito noong 2017.
Si Villar, isa sa mga senatorial bet na inendorso ni program host Mayor Sara Duterte, ang namahala sa matagumpay na pagpapatupad ng BBB bilang kalihim ng Department of Public Works and Highways.
Ang BBB na sentrong programa ng administrasyong Pangulong Rodrigo R. Duterte na naglalayong ihatid ang “Golden age of infrastructure” sa Pilipinas ay “nararapat na magpatuloy na nakatuon sa mas malalaking proyektong imprastraktura sa buong bansa.”
“Gusto ko pong i-promote at i-push ang “Build, Build, Build” program na sinimulan ni President Rodrigo Duterte dahil nakita ko po ‘yung benepisyo para sa ating lahat, hindi lang po sa roads,” dagdag ni Villar.
Ang dating kongresista ng Las Piñas ay hinirang na DPWH secretary noong 2016. Pinangunahan niya ang pagtatayo at rehabilitasyon ng mga pangunahing highway, farm-to-market roads, tulay, bypasses o diversion roads, bukod sa iba pa na nagbibigay-daan sa economic zones at mga lugar na idineklarang destinasyon ng turismo.
Kabilang sa 100 flagship projects ng DPWH bilang subset ng BBB program ay ang Luzon Spine Express Network, South Luzon Express Way Toll Way 4, Metro Manila Skyway Stage 3, Metro Cebu Expressway, NLEX Harbour Link Segment 10, ang Cavite Laguna Expressway, Tarlac Pangasinan La Union Expressway, ang Laguna Lake Highway, ang Candon City Bypass Road sa Ilocos Sur, Pulilan-Baliuag Diversion Road sa Bulacan, Calapan-Roxas Road sa Oriental Mindoro, ang Mandaue Causeway Road sa Cebu, Dipolog-Oriquieta Road sa Misamis Occidental , Dumaguete North Road sa Negros Oriental, at ang Taytay-El Nido Road sa Palawan, at Davao Coastal Road sa Davao City.
Idinagdag niya na dadalhin niya ang programang “Build, Build, Build” sa legislative branch dahil sa patuloy na pagpapalawak ng imprastraktura, nagreresulta ito sa malawakang paglikha ng trabaho sa buong bansa na may direktang epekto sa mga Pilipino.
“Importante po na i-push natin sa legislative branch ang ‘Build, Build, Build’ program kasi ito rin po ang aangat sa ekonomiya natin. Ito rin ang makapagbibigay ng trabaho na kailangan natin ngayon dahil sa pandemya na malakas ang tama sa ating mga kababayan,” sabi ng Uniteam senatorial candidate.
Binubuo ang BBB program ng libu-libong proyekto na naglalayong mapabuti ang koneksyon, mapadali ang paglago sa bawat lalawigan sa buong bansa at pabilisin ang paggasta ng pampublikong imprastraktura mula sa average na 2.9 porsiyento ng gross domestic product.
Ben Rosario
