Nakahandang imbestigahan ng Senado ang sigalot sa pagitan ni Olympian pole vaulter EJ Obiena at ng Philippine Athletics Track and Field Association (PATAFA) upang matukoy kung kailangan magkaroon ng maayos na alituntunin sa paghawak ng pondo ng mga atleta.
Hindi maitagao ni Senador Christopher Lawrence Go, chairman ng Senate Committee on Sports, ang kanyang pagkadismaya sa isyu dahil sa halip aniya na suportahan si Obiena, mistula pa itong iniipit ng grupo ni PATAFA President Philip Ella Juico.
“I am disappointed that these issues are taking the attention away from the support and praise that should be given to world-class and promising pole vaulter EJ Obiena. As the country’s pride, he has the weight of a whole nation on his shoulders. The least we can do is unburden him with these issues,” sabi pa nito.
Pinayuhan naman ni Senate President Vicente Sotto si Obiena na ituon ang pansin sa kanyang mga ensayo at hayaan muna ang isyu habang sinabihan naman nito ang PATAFA na pwede naman nilang naayos ang gusot na hindi inihayag sa media.
Nauunawaan aniya nito ang buhay ng atleta, dahil minsan na rin siyang kumatawan sa bansa sa mga internasyunal na torneo sa larong bowling at napakahirap ding mahiwalay sa pamilya.
Nag-ugat ang usapin dahil sa alegasyon ni Juico na hindi binabayaran ni Obiena ang Ukranian coach nito na si Vitaly Petrov at pagsusumite nito ng umano’y palsipikadong liquidation papers sa PATAFA kamakailan.
Leonel Abasola
