MABABASA ang pasasalamat sa Twitter ni Sen. Richard Gordon sa fans ni Sarah Geronimo para sa charity drive na gagawin ng fans ng singer-actress upang makatulong sa mga biktima sa pagputok ng Taal volcano.
Tweet ni Sen. Gordon na chairman din ng Philippine Red Cross: “Thank you, @popsters25 for this initiative and choosing the Philippine Red Cross as your partner in helping the communities affected by #TaalEruption2020 #TeamSarah #popsters #teamgoodness.”
Ang tinutukoy ni Sen. Gordon na charity event na gagawin ng supporters ni Sarah Geronimo ay ang Tala Para sa Taal, isang Dance Flash Mob for a Cause. Gagawin ito sa Luneta Park sa January 18, 1pm. Pinayuhan ang magpa-participate na magsuot ng pink shirt at ang registration fee na P100.000 ang magsisilbing donation nila para sa charity drive at ido-donate sa Philippine Red Cross.
Ang tawag sa charity event na Tala Para sa Taal ay galing sa viral dance craze na Tala na pinauso ni Sarah. Nakakatuwa na pagkatapos i-announce sa Facebook ang charity drive ay marami agad ang nagpahayag ng interest na sumali para na rin makatulong.
-NITZ MIRALLES
