NAGDALA ng karangalan sa bayan ang magkapatid na Ivan Travis at Jericho Winston Cu matapos pangunahan ang PH kids chess team sa katatapos na 36th Singapore National Age Group Chess Championships na ginanap sa Expo MAX Atria sa Singapore mula Disyembre 27 hanggang 30, 2019.
Ginapi ni Ivan Travis Cu si Oscar Gao ng Australia sa eight at final round para mag runner-up place sa Boys 10 and under na may naipong pitong panalo at isang talo kay eventual champion Zi Han Goh ng Singapore na nakamit ang titulo sa pagkamada ng perfect 8 puntos kasabay ng pananaig kay Alexandre Km Lee ng England sa final canto.
Nagpakitang gilas din ang nakababatang kapatid na si Jericho Winston Cu ng nakamit ang overall 8th place sa Boys 9 and under na may 5.5 puntos matapos manalo sa huling laro kontra kay Shravan Shetty Kashyap ng India.
Si Hao Loong Yee ng Malaysia ang naghari sa Boys 9 and under matapos makaungos sa tie break points kontra kay fellow 6.5 pointers at eventual runner-up place Kunal Patil Aditya ng India.
Ang magkapatid na Ivan Travis at Jericho Winston Cu na pambato nina Xavier School Athletic Director Mr. Larry De Las Penas at Chess Coach IA Rolando “Rolly” Yutuc ay suportado ang kanilang kampanya ng Philippine Amusement and Gaming Corporation (PAGCOR), Philippine Sports Commission (PSC) at ng National Chess Federation of the Philippines (NCFP) mua sa gabay ni Deputy Secretary-General at Executive Director FA Red Dumuk.
Nasilayan din si Singapore based Pinoy Jayson Jacobo Tiburcio sa Boys Under 11 na umiskor ng 5.5 puntos tungo sa overall 8th place habang bida din si Jillianne Cait Keesha Micarsos sa Girls Under 7 na over all 10th place na may 5 puntos.
Ang iba pang lumahok ay sina Singapore based Arcege Tan Castillo na 4.5 puntos sa Boys Under 11 tungo sa overall 23rd place; Jewelle Iris Anacio na nakapagkamada ng 3 puntos sa Girls Under 7 para sa overall 20th place at Dastan Earl Bueno na may naipong 2.5 puntos sa Boys Under 9 para sa overall 52nd place.
