POSIBLENG maganap ngayong taon ang inaabangang ‘unification fight’ sa pagitan nina World Boxing Organization (WBO) bantamweight titleholder Filipino Johnriel Casimero at Japanese International Boxing Federation at World Boxing Association (WBA) bantamweight champion Naoya Inoue.
Sa panayam na nailathala sa boxingscene.com, sinabi ni TOP Rank Promotions chief Bob Arum na nagsimula na ang negosasyon sa magkabilang kampo at inasahang magkakaroon ng kalinawan ang usapin ngayong buwan.
Mismong si Casimero ang nagpahayag na gusto nitong makaharap si Inoue, tumalo kay Filipino-American Nonito “The Filipino Flash” Donaire sa finals ng World Series of Boxing sa nakalipas na taon. Ang natyrang laban ay kandidato para sa ‘Fight of the Year’ ng boxing bodies.
Kabilang din si World Boxing Council bantamweight titlist Nordine Oubaali ng France sa nakalinyang humamon kina Inoue at Casimero.
Ngunit, nauna na ang desisyon ng WBC kay Oubaali na ipagtanggol ang kanyang titulo laban sa mandatory challenger na si Donaire.
May ilang araw pa ang grupo nina Donaire at Oubaali para tumugon sa utos ng WBC dahil hanggang Enero 15 ang deadline na ibinigay ng world boxing body.
Impresibo ang rekord ni Casimero na galing sa limang sunud-sunod na knockout wins na nagsimula noong 2018 nang pataubin nito si Jose Pech ng Mexico via second-round knockout victory sa Tijuana, Mexico.
Tinuldukan ni Casimero ang kampanya nito noong nakaraang taon sa dominanteng third round technical knockout win kay dating WBO champion Zolani Tete ng South Africa noong Nobyembre 30 sa London, England.
