NAGULAT kami nang makita namin si Sylvia Sanchez sa kaarawan ni Daddie Wowie na producer ng indie film na ginagawa ngayon ng aktres na may working title na Jesusa, na idinirek ni Ronald Carballo dahil bago ang imahe niya.
Nasa bucket list ni Ibyang ang karakter niya sa Jesusa dahil isa siyang adik o gumon sa ipinagbabawal na gamot.
Anyway, nanibago kasi kami sa aktres dahil bukod sa nagpagupit ng buhok ay naka-carrot jeans at maluwag na polong naka-tuck in siya. Hindi kasi ganito ang get-up ni Ibyang kapag may mga lakad.
Kaya tinanong namin, “anong get-up ‘yan? Bagong imahe?” at tinawanan lang kami.
“’Di ba nga, gusto kong bagong look sa teleserye namin?,” kaswal na sagot ng aktres.
Ang binabanggit na serye ni Sylvia ay mula sa RSB unit na pinangungunahan nina JM De Guzman, Arci Munoz at Joey Marquez.
Oo nga naman, halos lahat kasi ng soap drama na tinampukan niya ay halos iisa ang itsura ng aktres kaya siguro bigla niyang iniba sa pagpasok ng 2019.
E, bakit pati pananamit, pang milenyal, “e, gusto ko, bakit ayaw mo? Hindi ko ba bagay?” sunud-sunod na tanong sa amin.
‘Bumagay nga, bumata ka tingnan, nagulat lang ako,’ katwiran namin.
Samantala, sobrang saya ni Ibyang dahil ang dami niyang projects sa pagpasok ng 2019 kasi bukod sa indie film na Jesusa ay on-going na ang taping ng seryeng kinabibilangan niya. Hindi lang iyan dahil kabilang din siya sa pelikula nina Liza Soberano at Enrique Gil at may shooting siya sa Linggo, Enero 13, sa isang kilalang museum sa Pilipinas.
May upcoming movies pa siyang naka-line up na hindi pa puwedeng banggitin at higit sa lahat, maganda ang feedback ng travel vlog niyang Sylviahera.
Binati namina ang gamit niyang sasakyan sa volg kasi ang ganda, kaya tinanong na rin namin kung sino sa mga anak niya ang may-ari dahil very millennial, “akin ‘to. Regalo ko sa sarili ko,” mabilis nitong sagot.
Ay kaya naman pala pang-milenyal rin ang get-up niya, kasi ibinagay sa bagong kotse, ha, ha, ha. In fairness, bagay nga sa ‘yo, Ibyang.
-REGEE BONOAN
