Inaasahan nang darating sa bansa sa unang linggo ng Setyembre ang unang shipment ng imported na galunggong.
Ito ang sinabi kahapon ni Department of Agriculture (DA) Secretary Manny Piñol, idinagdag na tatlong bansa ang posibleng pagmulan ng inangkat na galunggong, ang China, Vietnam, at Taiwan.
Aniya, kapwa zero tariff kapag galing sa Vietnam at China, habang mayroon namang limang porsiyentong taripa kapag galing sa Taiwan.
“Tatlo ang pinanggalingan ng imported na galunggong, una Vietnam, China and then Taiwan. Ang Vietnam at China zero tariff ‘yan, ang Taiwan naman, 5% tariff. Ibig sabihin singko porsyento na taripa ang ipapataw. ‘Yung suggestions kasi ng ating mga econimic manager na tanggalin ang tariff, ano pang tatanggalin natin eh zero tariff na nga,” ani Piñol.
Inaasahang makatutulong ang pag-aangkat ng galunggong sa patuloy na pagtaas ng presyo ng naturang isda sa mga pamilihan.
Sa ngayon ay umaabot na sa P140 hanggang P170 ang presyo ng kada kilo ng galunggong.
Samantala, sa gitna ng pagdududa ng ilan na kontaminado umano ng formalin ang ilang imported na galunggong, sinabi ni Piñol na maaari namang idaan sa pagsusuri ang mga nasabing isda na inaangkat sa ibang bansa.
Ito ay para matiyak na hindi kontaminado at ligtas kainin ang mga imported na isda.
“Does it really matter where the fish would come from? For as long as hindi ilegal ang fishing method na gagamitin sa paghuli ng isda. We can always come up with a testing procedure as part of ating sanitary requirement. We can do that bago i-ship ‘yung mga galunggong. We can conduct a test doon sa pinanggalingan para malaman natin at we will be able to reassure our consumers na hindi peligroso sa kanilang katawan ang isda,” ani Piñol.
Ginawa ni Piñol ang pahayag kasunod ng mga pangamba na baka kontaminado ng formalin ang galunggong na nanggagaling sa China.
-Beth Camia
