Ni Reggee Bonoan
HINDI nagpahuli sina Arjo Atayde at Sue Ramirez sa pagpapakilig ng kanilang supporters nitong Araw ng mga Puso. Nag-post ang dalawa ng video na kumakanta ang aktres ng Cry ni Mandy Moore.
Chorus ang kinakanta ni Sue na, “in places no one will find, all your feelings deep inside” at si Arjo ang back-up ng, ‘deep inside’ at nagkakatawanan ang dalawa.
Umabot sa 40,600 ang views sa video ng ArSue o PaNa sa loob lang ng 3 oras at 116 comments kinikilig sila sa dalawa kapag napapanood sa Hanggang Saan teleserye.
Nalaman namin na ang gumaganap na Yaya Letty ni Sue sa serye na si Ms. Ces Quesada ang nagprisintang presidente ng kanilang love team.
Kinikilig daw ang batikang aktres kapag nakikitang magkasamang masaya at kung anu-ano ang pinag-uusapan off-cam nina Arjo at Sue.
Tinanong namin ang aming source kung hindi nagseselos ang real life partners nina Sue at Arjo sa kaduda-duda nang sweetness ng dalawa.
“Ay, ewan ko po, ask mo silang dalawa kasi kapag nasa set sila ang sweet nila. Siguro talagang pinaninindigan nila ang karakter nilang Paco at Anna,” sabi sa amin.
Bilib din naman kami sa partner ng aktor at aktres na hindi pumipiktyur kahit siguro nakararamdam na sila ng selos, ayaw siguro nilang makasira sa love team nina Arjo at Sue. At least, understanding at professional sila.
Pero teka, hindi ba nagkakadebelopan ang ArSue na parati silang magkasama?
“Hindi po masabi kasi sweet sila, eh. ‘Pag tinutukso sila sa set, tumatawa lang sila,” sagot ng source.
Anyway, hindi nakalimutan ni Arjo na padalhan ng Valentine balloons ang kanyang inang si Sylvia Sanchez, inilagay niya iyon sa kuwarto at ipinost na may nakasulat na, “Thank you to @cestcagiftworks for helping me pick out a gift for my Mom! #HappyValentinesDay!” Umabot ng 3k ang likes sa sa post sa loob lang ng 30 minuto.
Nag-post din si Sue sa Instagram ng litrato nila ni Arjo na magkayakap at may caption na, “Happy Wednesday! Ang gwapo naman ng Valentine mo, Anna! #HSMarkado #TeamPaNa.”
Tsinek namin ang laman ng IG ni Sue at puro litrato nila ni Arjo ang laman bukod pa sa mga pino-promote niyang produkto. At gayun din ang aktor na puro ang aktres ang laman bukod sa pamilya’t mga kaibigan.
