Ni MIKE U. CRISMUNDO, at ulat ni Chito A. Chavez
BUTUAN CITY – Isang ginang at mga anak niyang edad anim at tatlo ang nasawi, habang nakaligtas naman ang kanilang padre de pamilya nang matabunan ng lupa at mga bato ang kanilang bahay sa Purok 8, Barangay Gamuton sa Carrascal, Surigao del Sur, kasabay ng pagla-landfall ng bagyong ‘Basyang’ bandang 9:15 ng umaga kahapon sa kalapit na bayan ng Cortes.
Kinilala ng pulisya ang mga nasawi na sina Irene Lamela Benguillo, 33; AJ Benguillo, 6; at MJ Benguillo, tatlong taong gulang. Ginagamot naman sa ospital si James Benguillo, 33 anyos.
Inaalam naman ng lokal na pamahalaan ng Carrascal ang pagkakakilanlan ng iba pang nakaligtas sa landslide sa mga liblib na barangay ng Gamotan at Babuyan.
Kasabay nito, isang 10-anyos na babae ang nalunod makaraang tangayin ng malakas na agos ng tubig sa Purok 3, Bgy. Anislagan sa bayan ng Placer.
Kinilala ng pulisya ang biktimang si Rosaline E. Gabeligno, Grade 5 student ng Barangay Anislagan Elementary School, na nalunod bandang 7:00 ng umaga kahapon.
Nasa 629 na pamilya naman, o 2,236 na katao ang apektado ng pananalasa n Basyang sa Caraga region habang isinusulat ang balitang ito.
Suspendido ang klase at maging ang mga paglalayag sa rehiyon dahil sa bagyo.
Nasa 26 na lugar ang isinailalim sa Signal No. 1, na namataan sa Bohol Sea bandang 4:00 ng hapon kahapon makaraang tumawid sa mga lalawigan sa Surigao at Agusan Del Norte.
Ayon sa Philippine Atmospheric, Geophysical and Astronomical Services Administration (PAGASA), natukoy ang mata ng Basyang sa 60 kilometro (km) sa katimugan ng Maasin City, Southern Leyte at may lakas na 55 kilometers per hour (kph) na may bugsong aabot sa 80 kph.
