Ni: Gilbert Espeña
KAPWA nakuha nina dating WBA interim junior flyweight champion Randy Petalcorin ng Pilipinas at two-time Indonesian champion Oscar Rafnaka ang 110 pounds catch weight para sa kanilang 10-round na sagupaan ngayon sa Melbourne, Australia.
Binansagang “Ultratune Fight Night” ni promoter Peter Maniatis Events ang sagupaang gagawin sa Malvern Town Hall kung saan itataya ni Petalcorin ang kanyang mataas na rankings sa IBF, WBO at WBC laban kay Raknafa na dating WBO Asia Pacific mini flyweight titlist.
“I got the distance with current WBO world champion Kosei Tanaka and also defeated WBA champion Muhammed Rachman so I can handle boxers at this level,” pagyayabang ni Rakfana.
Wala namang sinabi si Petalcorin kundi nagsanay siya nang mabuti para sa ikaapat na laban niya sa Australia at nagpasalamat sa kanyang promoter.
“I have trained hard, it’s my fourth fight in Melbourne. I really like fighting here thank you to Ultratune, Mr Sean Buckley and Promoter Peter Maniatis,” sambit ni Petalcorin sa kanyang social media page.
Nangako naman si Maniatis na bibigyan ng world title fight si Petalcorin sa taong 2018.
“Let’s get rid of the former world champion tag.”, diin ni Maniatis lalo’t mandatory contender na ang Pinoy boxer sa kababayang si IBF light flyweight champion Milan Melindo.
Masama ang karanasan ni Petalcorin sa kanyang huling laban sa Australia kung saan apat na beses niyang napabagsak si Omar Kimweri pero nanaig pa rin ang nakabase sa Australia na Tanzanian sa 12-round split decision noong Abril 15, 2016 sa sagupaan sa Flemington para sa bakanteng WBC Silver flyweight title.
