Ni JIMI ESCALA
KINUMPIRMA sa amin ng isang Kapamilya insider na magkasama sa abroad sina John Lloyd Cruz at si Ellen Adarna. Mismong isang taong malapit sa actor ang nagbalita sa source namin.
Kuwento pa ng informant, kahit marami ang pumigil ay itinuloy pa rin ni John Lloyd ang naturang bakasyon. Kaya hindi masisisi ng source namin ang nararamdamang sama ng loob sa actor ng mismong mga taong malalapit sa kanya.
May mga binitiwan din daw na pananalita si John Lloyd na nagtulak sa management ng Dos para pahintulutan na lang ang hiningi nitong “indefinite leave”.
Pero ang ikinalulungkot nang husto ng source namin ay ang malaking posibilidad na pagkawala sa ere ng sitcom na Home Sweet Home na pinangungunahan ng aktor at ni Toni Gonzaga.
Isa raw kasi sa napag-usapang kundisyon, kung hindi makakabalik ang actor sa ipinangakong araw ay ‘no choice” na ang management kundi sibakin ang sitcom.
Samantala, itinanggi ng source na isa-isa nang nagpu-pull out ang endorsement ni John Lloyd Cruz.
Ayaw magkomento ang informant namin sa nakarating na info sa amin na tatapusin na ni John Lloyd Cruz ang kaugnayan nito sa ABS-CBN.
