Ni ALI G. MACABALANG
COTABATO CITY – Patay sa ligaw na bala ang assistant regional director ng Civil Service Commission (CSC) sa Autonomous Region in Muslim Mindanao (ARMM) nang bumisita sa Marawi City sa Lanao del Sur nitong Huwebes.
Nasapol ng bala sa ulo si CSC-ARMM Assistant Director Marvin Ablando, 45, ayon sa report mula kay ARMM regional police director, Chief Supt. Reuben Theodore Sindac.
Bahagya namang nasugatan sa noo ang immediate boss ni Ablando na si CSC-ARMM Director Sandra Arnica Uzman, 43, na kasama niya sa pagbisita sa siyudad.
Ayon kay Chief Supt. Sindac, patungo sina Ablando at Uzman sa kapitolyo ng Lanao del Sur sa Marawi mula sa Mindanao State University main campus nang matamaan ng ligaw na bala ang kanilang sasakyan nitong Huwebes.
Batay sa salaysay ng hindi pinangalanang driver nina Ablando at Uzman, nakarinig siya ng “burst of gunfire before a bullet hit the windshield”, ayon kay Army Capt. Jo-Ann Petinglay, tagapagsalita ng Western Mindanao Command (WestMinCom).
Isinugod sina Ablando at Uzman sa Amai Pakpak Medical Center sa Marawi ngunit dead on arrival na ang una, ayon sa militar.
Ayon kay Petinglay, iniimbestigahan na ng awtoridad kung ligaw na bala o sadyang pinaputukan ang mga biktima.
