Ni Nitz Miralles
MAIINGGIT kay Miguel Tanfelix ang mga may crush at gustong manligaw kay Bianca Umali sa pahayag ng dalagita sa pinakahuling interview namin sa kanya sa taping ng Mulawin vs Ravena.
Sabi niya, ang puso at isip niya ay naka-focus lang kay Miguel.
“Si Miguel lang ang nakikita ko. Para akong kabayo na one-track mind dahil isa lang ang nakikita ko,” wika ni Bianca.
Paano kung may dumating na ibang lalaki sa buhay niya?
“Ayaw ko sa iba, si Miguel lang ang gusto ko. Ang hirap nga sa part ko, siya lang ang nakikita ko. Paano nga ‘pag may nakita siyang iba? Pero okay lang, kaya kong mag-adjust.”
Nagulat sina Bea Binene, Kiko Estrada at Dion Ignacio sa narinig na sinabi ni Bianca. Para na rin kasing pag-amin iyon na mahal niya ang ka-love team.
Sabagay, open din naman si Miguel na mahal siya nito at ayaw na may ibang manligaw sa kanya. Hindi pa lang siya nito maligawan dahil bata pa siya sa edad na 17.
Kampante sina Bianca at Miguel na hindi bubuwagin ng GMA-7 ang love team nila kahit tapos na ang Mulawin vs Ravena.
Naniniwala silang may mga project pang inihahanda ang network para sa kanila.
Sa ngayon, hihintayin muna nilang matapos ang fantaserye na magwawakas sa September 15. Sa nasabing petsa malalaman ang ending nina Lawiswis (Bianca) at Pagaspas (Miguel).
