Ni LITO T. MAÑAGO
“PARANG gusto ko nang magkaanak dahil sa show na ito,” biro ng indefatigable host na si Billy Crawford bago ginanap ang special preview ng pilot episode ng PH franchise ng Little Big Shots sa Dolphy Theater kamakailan.
Parehong sumalang sa audition sina Billy at Ogie Alcasid pero nanggaling ang final say sa Warner Bros., ang franchise owner ng Little Big Shots na konsepto nina Ellen de Generes at Steve Harvey.
Walang kinalaman ang staff ng programa at network sa pagpili ng host.
“Hindi ko iniisip na makukuha ko ‘yung hosting,” sabi ni Billy.
Nilinaw ni Billy na hindi host kundi ‘yung mga batang edad 2 hanggang 12 ang bida sa programa.
“Sa title pa lang, Little Big Shots, kaya ang mga big star natin dito ‘yung mga kabataan. It was a challenging role for me to play kasi I would expect, like Steve Harvey or other hosts sa ibang bansa, mga parents na po sila. So, ‘yun po ‘yung sa akin.
“I guess, ibinigay na ni Lord ito sa akin and I really couldn’t ask for more. So happy to have this show,” lahad ng fiancé ni Coleen Garcia.
“Ilang beses na naming napanood ‘yung pilot episode and every time na pinanonood namin, naa-amazed kami lagi. There is always something that makes us smile,” pagtatapat niya.
“’Binuhos po namin ‘yung puso namin dito sa programang ito and I couldn’t thank God more for this opportunity para makilala natin ‘yung mga genius, talented, and cute na mga batang ito. So, thank you so much.”
Nag-pilot na ang Big Little Shots nitong nakaraang weekend at mapapanood kada Sabado at Linggo ng gabi sa ABS-CBN.
